حابار
 

«تابيعات» تارتىپكە شاقىردى

ۋاقىتى : 2013-04-04   |   جولداۋشى : سارماي   |   كەلۋ قاينارى : ايقىن تورابى   |   كورىلىمى : 1966 رەت
«تابيعات» تارتىپكە شاقىردى

زاڭ بۇزۋشىلىقتاردىڭ الدىن الۋ ماقساتىندا الماتى وبلىستىق ءىىد قىزمەتكەرلەرى شۇعىل تۇردە «تابيعات» ءىس-شاراسىن قولعا الىپ، زاڭ بۇزعان ازاماتتاردى قاتاڭ تۇردە تارتىپكە شاقىردى.

-«تابيعات» ءىس-شاراسىن قولعا الماس بۇرىن الدىمەن، وبلىستىڭ بارلىق ايماقتارىندا-اۋداندار مەن ەلدى مەكەندەردە جەدەل توپتار قۇرىلىپ، ولارعا ارنايى تاپسىرما بەرىلدى. ءسويتىپ، ءىس-شارا جۇرگىزىلگەن توعىز كۇننىڭ ىشىندە وبلىس اۋماعىندا ەكولوگيالىق زاڭ بۇزۋشىلىق سيپاتىنداعى 173 وقيعا دەر كەزىندە انىقتالىپ، 13 ەكولوگيالىق قىلمىس تىركەلدى. اسىرەسە، تالعار اۋدانى مەن قاپشاعاي قالاسى اۋماعىندا اناعۇرلىم كوپ زاڭ بۇزۋشىلىققا جول بەرىلگەنى بەلگىلى بولدى. ءىس-شارا بارىسىندا ءۇش قىلمىستىق ءىس قوزعالىپ، زاڭ بۇزۋشىلارعا قاتىستى جينالعان بارلىق قۇجات جەرگىلىكتى سوتقا جىبەرىلدى. ناقتىراق ايتقاندا، جىلدان-جىلعا قۇرىپ بارا جاتقان وسىمدىكتەردى زاڭسىز جيناۋمەن قاتار، اۋلاۋعا قاتاڭ تىيىم سالىنعان. جان-جانۋارلار مەن قۇستاردى زاڭسىز ۇستاۋ، وزەن-كولدەردەن رۇقساتسىز بالىق اۋلاۋ ءتارىزدى ورەسكەل زاڭ بۇزۋشىلىقتار ورىن الىپ، كۇدىكتىلەردىڭ ءبارى زاڭ جۇزىندە جاۋاپقا تارتىلۋدا، -دەيدى الماتى وبلىستىق ءىىد اكىمشىلىك پوليتسياسى باسقارۋ دەپارتامەنتىنىڭ باستىعى، پوليتسيا پولكوۆنيگى جولداسبەك الماشيەۆ. وبلىس پوليتسەيلەرى ءبىر اپتادان استام ۋاقىت جۇزەگە اسىرعان جەدەل ءىس-شارا بارىسىندا 54 كەلە بالىقتى زاڭسىز اۋلاعان 173 تۇرعىن تابيعاتتى قورعاۋ زاڭىن ورەسكەل بۇزعانى ءۇشىن اكىمشىلىك تۇرعىدان جاۋاپقا تارتىلدى. ولاردان بالىق اۋلايتىن 36 قۇرال-جابدىق جانە 45 دانا قارۋ تاركىلەندى.

-جالپى، «تابيعات» ءىس-شاراسى بارىسىندا اعاشتاردى رۇقساتسىز كەسۋگە قاتىستى-34، جان-جانۋرالاردى زاڭسىز اتىپ الۋ بويىنشا-87، بالىق اۋلاۋ ەرەجەسىن ورەسكەل بۇزۋعا قاتىستى-39 وقيعانىڭ بەتى اشىلىپ، 170-تەن استام ادام اكىمشىلىك جاۋاپقا تارتىلدى. ولاردان مەملەكەت قازىناسىنا جالپى كولەمى 221 مىڭ 560 تەڭگە ايىپپۇل ءوندىرىلدى، -دەيدى باسقارما باستىعى، پوليتسيا پولكوۆنيگى جولداسبەك الماشيەۆ.