ايگىلى ادامداردىڭ تاپقىرلىعى 1- ءبولىم - كەرۋەن تورابى

ايگىلى ادامداردىڭ تاپقىرلىعى 1- ءبولىم

ومىردە ايگىلى ادامداردىڭ تۇرلى تاپقىرلىققا باراتىنى بار. كەيىن سول ۇتىمدى ءسوزى مەن ارەكەتى تسيتاتاعا اينالىپ جاتادى. نازارلارىڭىزعا اتاقتى ادامداردىڭ ومىرىنەن ءبىر ۇزىك سىر ۇسىنامىز.

بەرنارد شوۋ

ءبىر كۇنى بەرنارد شوۋ ات ءمىنىپ سەرۋەندەۋگە شىعادى. پوشتا قىزمەتىنىڭ قاسىنا كەلگەندە جولىندا كەزدەسكەن ادامعا ءوتىنىپ:

– كەشىرىڭىز، مىنا اتتى از ۋاقىتقا ۇستاپ تۇراسىز با، مەن پوشتاعا كىرىپ شىعايىن؟- دەيدى.

سوندا بەيتانىس ادام جاقتىرماي قاراپ:

– نە دەپ تۇرسىز؟! مەن پارلامەنت مۇشەسىمىن! – دەيدى.

بەرنارد شوۋ جىميىپ:

– ءبىر قاراعاندا ادال، يماندى جانە نامىسقوي ادامعا ۇقسايسىز. مەيلى، مەن سىزگە سەنىپ اتىمدى ۋاقىتشا تاپسىرامىن، – دەگەن ەكەن.

ەنريكو كارۋزو

ايگىلى وپەرا ءانشىسى ەنريكو كارۋزو امەريكاعا العاش كەلگەندە، وعان جۋرناليستەر سۇراقتى قارشا بوراتقان. ولاردىڭ ءبىرى انشىدەن:

– يتاليا مەن اقش ساۋدا قاتىناستارى تۋرالى نە ايتا الاسىز؟ – دەپ سۇراق قويادى.

«مەن بۇل تۋرالى ەشقاشان ويلاماپپىن»، – دەيدى ءانشى ءسال ۇيالىپ، – ءبىراق مەن ەرتەڭگى گازەتتەردەن نە ايتقانىمدى ءبىلىپ الاتىنىما سەنىمدىمىن»، – دەگەن ەكەن.

البەرت ەينشتەين

ءبىر كۇنى ەينشتەين دوستارىمەن تابيعات اياسىندا قىدىرىپ ءجۇرىپ:

– الدىمىزدا تۇرعان مىنا تاۋدىڭ ۇشار باسىندا ەجەلگى ساراي قالدىقتارى بار. قۇز باسىنداعى تار سوقپاقپەن جۇرسەڭىزدەر، تاۋ ەتەگىندەگى جاسىل القاپقا شىعاسىزدار. ءبىراق تار سوقپاقپەن ءجۇرۋ وتە قاۋىپتى. ابايلاماساڭىزدار، قۇلاپ كەتەسىزدەر. ەگەر دە قۇزدان قۇلاپ كەتەتىن بولساڭىزدار، وڭ جاققا قاراۋدى ۇمىتپاڭىزدار. سەبەبى، وڭ جاقتان تاۋدىڭ عاجاپ تابيعاتىن كورە الاسىزدار، – دەگەن ەكەن.

ميحايل ەۆگرافوۆيچ سالتىكوۆ-ششەدرين

ءومىرىنىڭ سوڭعى جىلدارىندا جازۋشى م.ە. سالتىكوۆ-ششەدرين قاتتى اۋرۋدان ازاپ شەگەدى. سوندا دا ول شىعارماشىلىقپەن اينالىسىپ، قابىلداۋىنا كەلگەن ادامدارمەن سويلەسۋگە ۋاقىت تابادى. ءبىراق ءومىرىنىڭ سوڭعى كۇنىندە ءتىپتى توسەكتەن تۇرا الماي قالادى. ءبىراق ءبىر ادام قايتا-قايتا قابىلداۋىن سۇراپ وتىنگەن. سوندا سالتىكوۆ-ششەدرين كومەكشىسىنە:

«شىعىپ، ودان كەشىرىم سۇرا دا، مەنىڭ بوس ەمەسىمدى – ولەيىن دەپ جاتقانىمدى ايت» دەگەن ەكەن.

البەرت ەينشتەين «سالىستىرمالىلىق تەورياسىن» جازعاننان كەيىن الەمگە ايگىلى بولدى. عالىمدى حالىقارالىق كونفەرەنتسيالار مەن ۋنيۆەرسيتەتتەر ءدارىس وقۋعا شاقىرادى. كۇن سايىن ءار ۋنيۆەرسيتەتتە وسى تەوريا بويىنشا ءدارىس وقيدى.

ءبىر كۇنى عالىمنىڭ جۇرگىزۋشىسى:

– مىرزا، ءسىز وسى تەوريا جونىندە كوپ ايتقانىڭىز سونشا، ونى مەن جاتتاپ الدىم، - دەيدى.

سوندا ايگىلى عالىم:

– ءبالى، سولاي ما؟ وندا كەلەسى جولى ءدارىستى سەن وقيسىڭ! مەن ءدارىسحانانىڭ سوڭعى ورىندىعىندا تىڭداۋشىلارمەن بىرگە وتىرام - دەيدى.

شىنىندا دا كەلەسى ءدارىستى جۇرگىزۋشى وقيدى. ونىڭ «سالىستىرمالىق تەوريا» جونىندە شەبەر ءدارىس وقىعانى سونشا، اۋديتورياداعىلار مىنبەردەن شاپالاق ۇرىپ شىعارىپ سالادى.

مىنبەردەن ءتۇسىپ بارا جاتقاندا، تىڭداۋشىلاردىڭ ءبىرى وعان كەنەتتەن وسى تەوريا بويىنشا قيىن سۇراق قويادى.

تاپقىر جۇرگىزۋشى ىركىلمەي:

– سۇراعىڭىز تىم وڭاي ەكەن. ونى مەن تۇگىل جۇرگىزۋشىم دە بىلەدى، – دەپ ەينشتەيننىڭ وزىنە سىلتەپ جىبەرىپتى.

جالعاسى كەلەر ساندا...

قاينار: يىنتەرنەتتەن | رەداكتور: اراي | كورىلىم : 597 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز