ناۋرىزداعى قازاقى ىرىمدار - كەرۋەن تورابى

ناۋرىزداعى قازاقى ىرىمدار

ۇلىستىڭ ۇلى كۇنى سانالعان ناۋرىز – تۇركى جۇرتىنىڭ مەرەيلى مەيرامى. ورتالىق ازيا حالقىندا 5 مىڭ جىلدان بەرى تويلانىپ كەلەدى.

ناۋرىزعا قاتىستى حالىق تانىمىندا ءتۇرلى سالت-ءداستۇر، نانىم-سەنىم مەن ادەت-عۇرىپ بار. جىل باسىنان جاقسىلىق كۇتىپ، ءار ءىستى جاقسى ىرىمعا بالايدى. بۇگىنگى ايتپاعىمىز دا وسى ناۋرىزداعى نانىم-سەنىم مەن ىرىمدار جايلى بولماق.

• قازاق حالقى ناۋرىز مەيرامىنان ءبىر كۇن بۇرىن ۇيلەرىن قاعىپ-سىلكىپ تازالايدى. مەرەكە كۇنى كيەتىن ساندى كيىمدەرىن ازىرلەيدى. كىرلەرىن كۇن ىلگەرى جۋادى. ناۋرىز كۇنى كىر جۋسا ۇيدەن «قۇت ۇركەدى»، باستان باق تايادى دەپ تۇسىنگەن.

• قازاق ناۋرىز كۇنى جاڭا شىققان كۇننىڭ جۇزىنە قاراپ بەتىن سيپايدى. ونىسى جاڭا كۇننەن باسىما باقىت دارىسىن دەگەنى.

• ناۋرىز كۇنى العاش جاۋعان جاڭبىرعا باسىن توسىپ، جاقسىلىق كۇتۋ نانىمى دا بار. اسپاننان نۇر جاۋادى دەپ بىلەدى. وسىلاي ىستەسە جىلدار بويى باسىم اۋىرمايدى، جولىم جەڭىل بولادى دەپ سەنەدى.

• قازاق ناۋرىز كۇنى ۇيىنە قارلىعاش ۇشىپ كىرسە، ەرەكشە قۋانادى. جىل قۇسى كىردى، شاڭىراعىما قۇت كىردى دەپ ىرىمدايدى.

• قازاق ناۋرىز كۇنى تىرناق المايدى، شاش قيعىزبايدى. ولاي ەتسە باق كەسىلەدى، جول توسىلادى دەپ ىرىم ەتەدى.

• قازاق ناۋرىز كۇنى ىدىس-اياعىن سىلدىرلاتپايدى، قۇت قازاندا تۇرادى دەپ ىرىم ەتەدى. ىدىس-اياق سىلدىرلاسا قۇت ۇركەدى دەپ سەنەدى.

• قازاق ناۋرىز كۇنى وتقا سۇيەك تاستاپ كۇيدىرمەيدى. ولاي جاساسا اتا-بابا ارۋاعى شامىرقانادى دەپ ىرىم ەتەدى.

• قازاق ناۋرىز كۇنى قىدىرىپ كەلگەن بالانى قۇر قول شىعارمايدى. بالا باقىت، بالا بال، بالامەن بىرگە ۇيگە باقىت كىرەدى. بالا ۇيدەن وكپەلەپ شىقسا، باقىت بالامەن ىلەسىپ كەتەدى دەپ نانادى.

• قازاق ناۋرىز كۇنى الىس ساپارعا كەتكەن جولاۋشىعا سىباعا ساقتايدى. ونىسى جولاۋشى امان كەلسىن، مەرەكە ءدامى بەرەكە، وسى بەرەكەلى استان اۋىز ءتيسىن دەگەنى.

• قازاق ناۋرىز كۇنى مالى تولدەسە، ونىڭ ءتولىن باسقا بىرەۋگە سىيلامايدى. سەبەبى جىل باسىنداعى قۇتىمىز باسقاعا اۋىپ كەتپەسىن دەگەنى.

• قازاق ناۋرىز كۇنى ساۋىسقان ءۇي توبەسىنە قونىپ شىقىلىقتاسا جاقسى ىرىمعا بالايدى. ولجادان، جاقسىلىقتان ءسۇيىنشى كەلەدى دەپ سەنەدى.

• قازاق ناۋرىز كۇنى ۇيىنە دۋالى اۋىزدى ادامدى شاقىرىپ باتاسىن الادى. بارلىق ءىس باتادان باستالسا باياندى بولادى دەپ سەنەدى.

قاينار: قازاقىستان تورابى | رەداكتور: سارماي | كورىلىم : 1800 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز