ەكران الدىندا جۇمىس ىستەۋگە ارنالعان كەڭەستەر - كەرۋەن تورابى

ەكران الدىندا جۇمىس ىستەۋگە ارنالعان كەڭەستەر

ەكران الدىندا جۇمىس ىستەۋ ءومىر سالتىمىزدىڭ ءبىر بولىگىنە اينالدى. كەيدە جۇمىس ۋاقىتىنان كەيىن دە كومپيۋتەر الدىندا وتىرۋعا تۋرا كەلەدى. بۇل كوزدىڭ كورۋ قابىلەتىنىڭ ناشارلاۋىنا اكەپ سوعۋى مۇمكىن. سوندىقتان بىرنەشە ەرەجەنى ۇستانعانىڭىز ابزال. سايتىمىز ەكران الدىندا جۇمىس ىستەۋ گيگيەناسى جونىندە ماتەريال دايىندادى.

ءارىپتىڭ ولشەمى

ۇساق ءارىپ كوزىڭىزدى اۋىرتادى. قاجەتتى تۇسىن كورۋ ءۇشىن ەكرانعا جاقىن وتىرۋعا تۋرا كەلەدى. مۇنىڭ اسەرىنەن باسىڭىز اۋىرىپ، تەز شارشاپ قالاسىز. سوندىقتان كومپيۋتەردىڭ ءارىپىن وزىڭىزگە ىڭعايلاپ العان ءجون. ءماتىندى نەمەسە كولەمدى اقپاراتتى وقۋ كەرەك بولسا، قاعاز بەتىنە شىعارىپ العانىڭىز دۇرىس. بۇل كوزىڭىزدى اۋىرتپايدى، ءارى ۋاقىتىڭىزدى دا ۇنەمدەيدى.

جارىق

تىم قاراڭعى نە شامادان تىس جارىق ەكران كوزىڭىزدىڭ شارشاۋىنا اسەر ەتەدى. جارىقتىڭ قاراڭعى بولۋى جازۋدى نە سۋرەتتى كورۋگە بوگەت بولادى. ال تىم جارىق ەكران كوزدى شارشاتادى. جاساۋراپ، تىتىركەنۋىنە دە سەبەپكەر بولۋى مۇمكىن. كوزىڭىز ءۇشىن ىڭعايلى جارىق دەڭگەيىن قولدانىڭىز. ادەتتە، بۇل بولمەنىڭ نەمەسە ءسىز وتىرعان مەكەمەنىڭ جارىعىمەن بىردەي بولادى.

كۇن ساۋلەسىنىڭ ءتۇسۋى

ەكران بەتىنە تۇسكەن كۇن ساۋلەسى ءسىزدىڭ جۇمىس ىستەۋىڭىزگە بوگەت جاسايدى. مۇنى شەشۋدىڭ ءۇش جولى بار:

ەكرانعا ارنالعان ارنايى قورعانىش پلەنكاسىن ساتىپ الۋعا بولادى. مۇنداي پلەنكالار كۇن ساۋلەسىن شاعىلىستىرمايدى؛

ەكراندى نەمەسە قويىن كومپيۋتەردى كۇن ساۋلەسى تۇسپەيتىن جەرگە ورنالاستىرىڭىز؛

ارنايى كومپيۋتەرمەن جۇمىسقا ارنالعان كوزىلدىرىك تاعۋ.

كومپيۋتەر ەكراننىڭ ورنالاسۋى

بۇل دا وتە ماڭىزدى. جۇمىس بارىسىندا ەكراننىڭ تىم جوعارى نە تومەن ورنالاسۋى سىزگە بىرنەشە ىڭعايسىزدىقتاردى تۋدىرادى. باسىڭىزدى قاتتى كوتەرىپ نەمەسە ەڭكەيىپ وتىرۋعا تۋرا كەلەدى.

دياگونالى 20 ديۋيمنەن كەم ەمەس ەكراندى قولدانساڭىز، ونىڭ جوعارعى تۇسى كوزدىڭ دەڭگەيىنەن 5-7cm جوعارى بولۋ كەرەك. ەگەر كىشى بولسا، كوز دەڭگەيىنەن تومەن ورنالاسقانى ءجون.

ەكراندى شالقايتىپ ورنالاستىرىڭىز. استىڭعى بولىگى ۇستىڭگىسىنە قاراعاندا سىزگە جاقىنىراق بولۋى كەرەك. سونىمەن قاتار ەكران تەڭ ورتادا تۇرۋى قاجەت.

كوزىڭىزدى تىنىقتىرۋدى ۇمىتپاڭىز

وقي وتىرىڭىز: كوزگە ارنالعان 12 جاتتىعۋ

«20/20/20» ءادىسىن پايدالانىڭىز. جۇمىس بارىسىندا ءار 20 مينۋت سايىن وزىڭىزدەن 20 مەتر قاشىقتىقتا ورنالسقان زاتقا 20 سەكۋند قاراپ تۇرىڭىز.

دەمالۋ تەحنيكاسىن قولدانۋعا دا بولادى. ىڭعايلى ورىن تاۋىپ، ارقاڭىزدى ءتۇزۋ ۇستاڭىز. كوزىڭىزدى جۇمىپ، مۇرىن ارقىلى تەرەڭ دەمالىڭىز. تىنىس الۋ 2 سەكۋندتان كەم بولاماعانى دۇرىس. 1-2 سەكۋند دەمدى ۇستاپ، 4 سەكۋند كولەمىندە اۋانى اۋزىڭىز ارقىلى شىعارىڭىز. مۇنى بىرنەشە رەت قايتالاۋ ارقىلى ميدى تىنىقتىراسىز. ارتىق ويدان ارىلىپ، كورۋ بەن تىنىس الۋ جۇيەسىن رەتتەيسىز.

قاينار: يىنتەرنەتتەن | رەداكتور: اراي | كورىلىم : 509 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز