جۇرەككە سۋىق ءتيۋى مۇمكىن بە؟ دارىگەردىڭ جاۋابى - كەرۋەن تورابى

جۇرەككە سۋىق ءتيۋى مۇمكىن بە؟ دارىگەردىڭ جاۋابى

كۇندەلىكتى ومىردە بۇيرەككە، قۋىققا، باسقا، دەنەگە سۋىق ءتيدى دەگەندى ءجيى ەستىپ جاتامىز. وكپەگە دە سۋىق تيەتىنى بارىنە بەلگىلى. ال جۇرەككە سۋىق تييۋى مۇمكىن بە؟ جۇرەك سۋىقتاپ قالدى دەگەندى ەستىدىڭىز بە؟

اسىرەسە كوروناۆيرۋس پنيەۆمونياسى تاراپ جاتقان ۋاقىتتا بۇل ساۋالدىڭ جاۋابى اسا وزەكتى. Massaget ءتىلشىسىنىڭ بۇل ساۋالىنا ا. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ كارديولوگ دارىگەرى راشيدا حاليمنازاروۆا جاۋاپ بەردى.

دارىگەردىڭ ايتۋىنشا، جۇرەككە سۋىق تييۋى ابدەن مۇمكىن.

 ادام اعزاسىنا ءتۇسىپ كەتكەن كەز كەلگەن ۆيرۋستىق نە باكتەريالدى ينفەكتسيا جۇرەك بۇلشىقەتىن قابىندىرىپ، جاسۋشا مەن ءتىندى جاراقاتتاۋى مۇمكىن. مۇنداي قۇبىلىستى ميوكارديت دەيدى. قاراپايىم تۇماۋ مەن سۋىق تييۋدىڭ ءوزى دۇرىس ەمدەلمەسە، جۇرەككە شابۋى مۇمكىن، -دەيدى راشيدا حاليمنازاروۆا.

اسىرەسە تۇماۋ اسقىنىپ كەتسە قيىن. وكپەنى قابىندىرعانى سياقتى جۇرەكتى دە قابىندىرۋى مۇمكىن.

جۇرەكتىڭ قابىنۋىنا باستى ەكى سەبەپ بار: ءبىرى– ينفەكتسيالىق، ەكىنشىسى– اۋتويممۋندى پروتسەسس پەن ۋلانۋ، رادياتسيا. ينفەكتسيالىق قابىنۋ ۆيرۋس، باكتەريا، ساڭىراۋقۇلاق پەن پارازيتتىڭ اعزاعا ءتۇسىپ كەتۋىنەن بولادى. اسىرەسە، كوكساكي ۆيرۋسى، ەنتەروۆيرۋستار، تسيتومەگالوۆيرۋس، ەپشتەين-بارر ۆيۋسى جانە تۇماۋ. بوررەليوز باكتەرياسى مەن زەڭ ساڭىراۋقۇلاعى دا جۇرەك قابىندىرۋعا قاۋقارلى.

ال اۋتويممۋندى اسقىنۋ اعزانىڭ يممۋندى جۇيەسى وز-وزىنە شابۋىل جاساپ، وزىنە زيان كەلتىرگەندە پايدا بولادى. قاتەرلى ىسىكتى ەمدەۋ كەزىندە قولدانىلاتىن ساۋلە دە جۇرەكتى جاراقاتتاۋى مۇمكىن.

جۇرەككە سۋىق تيگەنىن انىقتاۋ وڭاي. ءبارى اۋرۋدىڭ اۋىرلىعىنا بايلانىستى. بەلگىسى باسىندا-اق ءبىلىنۋى دە، بىلىنبەۋى دە مۇمكىن. بىلىنگەن جاعدايدا جۇرەك تۇسى قاتتى اۋىرادى. جۇرەككە اۋا جەتپەي قىسىلادى، ءجيى سوعادى. باس اينالىپ، تەرى كوگەرەدى.

جۇرەك قابىنۋدى ەمدەۋدىڭ جولى كوپ. كوبى ستانتسيونارلى رەجىمدە ەمدەلەدى. ديەتا، انتيبيوتيك، پرەپاراتتار تاعايىندالادى.

قاينار: ماسساگەت | رەداكتور: سارماي | كورىلىم : 587 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز