ۋولت ديسنەي العاشقى مۋلتفيلمدى قالاي شىعاردى؟ - كەرۋەن تورابى

ۋولت ديسنەي العاشقى مۋلتفيلمدى قالاي شىعاردى؟

ۋولت ديسنەي (1901-1966) – امەريكاندىق انيماتور، رەجيسسەر، اكتەر، ستسەناريست جانە پروديۋسەر. The Walt Disney Company مۋلتيمەديالىق يمپەرياسىنىڭ نەگىزىن قالاۋشى.

ديسنەي كينو تاريحىندا ءبىرىنشى بولىپ دىبىستىق جانە مۋزىكالىق مۋلتفيلمدەردى جاساپ شىعاردى. رەجيسسەر رەتىندە ۋولت ديسنەي 11 فيلم ءتۇسىرىپ، تاعى 576 فيلمنىڭ پروديۋسەرى اتاندى. ديسنەي كينو سالاسىنداعى قىزمەتى ءۇشىن 26 رەت وسكارمەن (ابسوليۋتتى رەكورد) جانە يرۆينگ تالبەرگ سيلىعىمەن ماراپاتتالدى.

ءومىربايانى

ۋولتەر ەلياس ديسنەي 1901- جىلى 5- جەلتوقساندا چيكاگودا دۇنيەگە كەلدى. ونىڭ اتا-بابالارىنىڭ اراسىندا اعىلشىندار، يرلاندتار جانە نەمىستەر بار. 1906- جىلى وتباسىمەن ميسسۋري شتاتىنداعى فەرماعا، ال 1910- جىلى كانزاس-سيتيگە كوشتى. 14 جاسىندا ول گازەت ساتۋشى بولىپ جۇمىس ىستەدى. ءبىرىنشى دۇنيەجۇزىلىك سوعىس كەزىندە ديسنەي فرانتسيادا حالىقارالىق قىزىل كرەستتىڭ جەدەل جاردەم كولىگىن باسقارىپ، ءبىر جىل قىزمەت ەتتى.

ديسنەي انتيكوممۋنيست بولدى. New York Times جازۋشىسى مارك ەليوتتىڭ كىتابىندا «ۋولت ديسنەي– گولليۆۋدتىڭ قارا حانزاداسى» دەپ مالىمدەگەن. ديسنەي فبر-مەن ۇزاق جىلدار جۇمىس ىستەدى دەگەن بولجام بار. جۋرناليست شيمون برايماننىڭ ايتۋىنشا، ديسنەي ءوزىنىڭ باستاماسى بويىنشا گولليۆۋدتاعى ارىپتەستەرىنىڭ ايىپتاۋلارىن بيۋروعا جازعان. سوعىستان كەيىن ۋولت ديسنەي امەريكاعا قارسى ءىس-قيمىل جونىندەگى كوميسسياعا كينو الەمىندەگى «جاسىرىن كوممۋنيستەردى» انىقتاۋعا بەلسەندى كومەكتەستى.

1925- جىلى ستۋديا حاتشىسى ليلليان بۋندسقا ۇيلەندى. 1933- جىلى ولاردىڭ ديانا مەري دەگەن قىزدارى دۇنيەگە كەلدى. ەرلى-زايىپتىلار 8 جىل بويى نارەستەلى بولا الماعان. ەكىنشى بالا تۋا الماي 1937- جىلى جۇپ كىشكەنتاي قىزدى اسىراپ الىپ، وعان شارون مەي ديسنەي ەسىمىن بەرەدى.

ديسنەيدىڭ كينوعا كەلۋى

1920- جىلى ديسنەي جارنامالىق كينوستۋديادا سۋرەتشى بولىپ جۇمىسقا ورنالاسادى. وندا ول العاشقى جارنامالىق فيلمدەرىن جاساي باستادى. سول كەزدەن باستاپ انيماتسيالىق تۋىندىلار جاساۋدى ارماندادى. ۋاقىت وتە كەلە ديسنەي كانزاس-سيتيدە ءوزىنىڭ العاشقىLaugh-O-Gram انيماتسيالىق ستۋدياسىن اشتى. وندا اب يۆەركس ونىڭ سەرىگى جانە جەتەكشى انيماتورى بولدى. الايدا كومپانيا كوپ ۇزاماي داعدارىسقا ۇشىرادى.

1922-1927- جىلدارى ول تازا شىعارماشىلىقپەن اينالىستى. 1923- جىلى ديسنەي لوس-اندجەلەسكە كوشىپ كەلەدى دە اعاسى رويمەن بىرگە گولليۆۋدتاThe Walt Disney Company شاعىن انيماتسيالىق ستۋدياسىن اشادى.

العاشقى تۋىندىسى

1924- جىلى 1- ناۋرىزدا ديسنەي ليۋيس كارروللدىڭ «اليسا عاجايىپتار الەمىندە» كىتابىنا سۇيەنە وتىرىپ، «اليسانىڭ تەڭىزدەگى كۇنى» اتتى العاشقى مۋلتفيلمىن ۇسىندى. سونداي-اق رەجيسسەر وسى كىتاپتىڭ كەيىپكەرىنىڭ قۇرمەتىنە 1926-1927- جىلدارى «اليسا انيماتسيا ەلىندە» اتتى بىرنەشە سەريالى فيلمدى شىعاردى. ديسنەيدە اليسانىڭ شىتىرمان وقيعالارى تۋرالى 56 فيلم تۇسىرىلگەن. سودان كەيىن ديسنەي مۋلتفيلمدەرىنىڭ ءستيلى قالىپتاسا باستادى.

ميككي ماۋس– ديسنەي برەندى

1927- جىلى «وسۆالد قويان» فيلمى ۇلكەن تانىمالدىلىققا يە بولدى جانە ونداعى كەيىپكەرلەر ديسنەيدىڭ برەندىنە اينالىپ، بىرنەشە مۋلتفيلمگە كىرىستىرىلدى. اب يۆەركس سالعان تىشقان الدىمەن مورتيمەر دەپ اتالدى، ءبىراق كوپ ۇزاماي ول ميككي ماۋس اتانىپ، بۇكىل الەمگە ايگىلى بولدى. العاش رەت تىشقان ميككي ماۋس«Crazy Airplane» دىبىسسىز فيلمىندە پايدا بولدى. سول جىلى ديسنەيدىڭ العاشقى دىبىستىق فيلمىنىڭ  –  «پاروحود ۋيلليدىڭ» كەيىپكەرى اتانادى. العاشقى بولىمدەردە ۋولتەردىڭ ءوزى تىشقاننىڭ داۋىسىن دىبىستايدى.

بۇل كەيىپكەرلەر كومپانيانى بايىتتى. كەيىپكەرلەر كوميكستەر بەتتەرىندە، نەشە ءتۇرلى دۇنيەلەر بەتىندە پايدا بولدى. 1930- جىلدارى ديسنەي كەيىپكەرلەرىنە ۇقساس ويىنشىقتار پايدا بولدى. ميككي ماۋس نەمەسە دونالد داكتىڭ سۋرەتتەرى بار ساعاتتار، كيىم بۇيىمدارى جانە باسقا دا كۇندەلىكتى زاتتار ساتىلىمعا شىقتى. ولاردىڭ كومەگىمەن بەلگىلى تاۋارلاردى جارنامالايتىن. كەيىن ديسنەي ءوزىنىڭ مۋلتفيلمدەرىندەگى كەيىپكەرلەردى كوممەرتسيالىق ماقساتتا پايدالانۋعا رۇقسات بەرەتىن ليتسەنزيالاردى ساتتى.

ديسنەي رەجيسسۋراسىنىڭ ەرەكشەلىگى

Disney مۋلتفيلمدەرىندە مۋزىكا ماڭىزدى رول اتقارادى. فيلمدەردە مۋزىكا تەك ديالوگتىڭ نەگىزى ەمەس، باستى فونى رەتىندە قارالادى. سول سەبەپتى ونداعى كەيىپكەرلەر ءجيى ءان ايتادى.

ديسنەيدىڭ سۋرەتشىلەرى جانۋارلاردى سالماس بۇرىن ءارقاشان ولاردىڭ ءتىرى پروتوتيپتەرىن مۇقيات زەرتتەگەن. سوندىقتان ەكرانداعى بارلىق قيمىلدار شىنايى كورىنەدى.

ۋولت ديسنەيدىڭ «قيال» مۋلتفيلمىندە العاش رەت كەڭ ەكراندا ستەرەو دىبىس شىعادى. داۋىس لەوپولد ستوكوۆسكيدىڭ جەتەكشىلىگىمەن فيلادەلفيا سيمفونيالىق وركەسترىمەن جازىلعان.

ديسنەي فيلمدى تۇسىرۋگە ارنالعان ءۇش ءتۇستى ماشينالاردى قولدانا باستاعان العاشقى رەجيسسەرلەردىڭ ءبىرى بولدى.

ۋولت ديسنەي ستۋدياسىندا كەيىن باسقا ستۋديالاردا انيماتورلارعا پرەميا ۇسىنىلدى. ەرەكشە تريۋك ۇسىنعان انيماتور سياقى الاتىن بولدى.

كومپانيانىڭ كەڭەيۋى

1950- جىلدارى ديسنەي ستۋدياسى ءوز قىزمەتىن كەڭەيتتى. اپتا سايىن «ديسنەيلەند» ويىن-ساۋىق تەلەباعدارلامالارىن دايىنداۋدى باستادى. 1955- جىلى لوس-اندجەلەستەگى اناحايمدا اتتراكتسيوندارى بار «ديسنەيلەند پاركى» ويىن-ساۋىق كەشەنى اشىلدى. وندا ارتىستەر كەيىپكەرلەردىڭ كوستيۋمىن كيىپ، بالالاردىڭ كوڭىلىن كوتەردى. 1971- جىلى ديسنەي الەمى ورلاندودا پايدا بولدى، ال 1992- جىلى پاريجدىڭ جانىنداEurodisneyland اشىلدى.

1966- جىلى 15- جەلتوقساندا ۋولت ديسنەي قايتىس بولادى. ۋولت ديسنەيدىڭ بىرنەشە جىلدىق جوسپارىن روي ديسنەي جۇزەگە اسىرادى.

قازىرگى ۋاقىتتا بۇل گولليۆۋدتاعى ەڭ ءىرى ستۋديالاردىڭ ءبىرى. كومپانيا 11 ويىن-ساۋىق پاركى مەن ەكى سۋ پاركىنىڭ، سونداي-اق بىرنەشە حابار تاراتۋ جەلىسىنىڭ، سونىڭ ىشىندە امەريكاندىق تەلەراديوكومپانيانىڭ(ABC) يەسى.

2009- جىلدىڭ تامىزىندا ۋولت ديسنەي كومپانياسىMarvel Entertainment كومپانياسىن 4.5 ميلليارد دوللارعا ساتىپ العانى بەلگىلى بولدى.

ۋولت ديسنەي كومپانياسىنىڭ باس كەڭسەسى جانە نەگىزگى ءوندىرىس ورىندارى بۋربانكتاعى (ا قش، كاليفورنيا) Disney Studios بولىمشەسىندە شوعىرلانعان.

ۋولت ديسنەي كومپانياسىDow Jones Industrial Average قۇرامىنا كىرەدى. 2019- جىلدىڭ قاراشاسىنا نارىقتىق قارجىلاندىرۋ $ 240 ميلليارد قۇرادى.

دايىنداعان: قىرمىزى

قاينار: يىنتەرنەتتەن | رەداكتور: ايگەرىم | كورىلىم : 117 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز