ومىرلىك ءمانى بار مىسالدار ومىردە ءوز ورنىڭىزدى تابۋعا جول اشادى - كەرۋەن تورابى

ومىرلىك ءمانى بار مىسالدار ومىردە ءوز ورنىڭىزدى تابۋعا جول اشادى

ومىرلىك ءمانى بار مىسالدار دانالىققا ۇيرەتەدى، كۇردەلى سۇراقتارعا قاراپايىم جاۋاپتار بەرەدى. جانە مىنەز-قۇلقىڭىز بەن اينالاڭىزدا نە بولىپ جاتقانىن قايتا قاراستىرۋعا كومەكتەسەدى. الەمگە وزگەشە قاراۋ ءۇشىن ەرىنبەي وقىپ شىعىڭىز. ءوز كەرەگىڭىزدى تابارىڭىزعا سەنىمىمىز مول.

ءونىمسىز ەڭبەك ەتۋ تۋرالى مىسال

اڭشى ورماندى كەزىپ ءجۇرىپ ءبىر وتىنشىعا تاپ بولادى. ول قىزۋ جۇمىسقا كىرىسىپ، قۇلاتقان اعاشتارىن بار كۇشىمەن ارالاپ جاتىر ەكەن. جۇمىسقا بەرىلگەنى سونشالىق، ءۇستى-باسى قالىڭ تەرگە مالشىنعان. وسىنشاما تەر توگىپ جاتقان ادامنىڭ جۇمىسى نە سەبەپتى باياۋ ءجۇرىپ جاتقانىن بىلمەككە ۇمتىلعان اڭشى ونىڭ جانىنا جاقىندايدى. جاقىنداي كەلە سەبەبىن دە تۇسىنگەن سياقتى.

— ءسىزدىڭ اراڭىزدىڭ تىستەرى وتكىر ەمەس قوي، — دەدى ورمانشى. — ازداپ ءجۇزىن وتكىرلەپ الساڭىز بولماي ما؟ — دەپ ءسوزىن جالعادى.

وتىنشى قاسىنان ءوتىپ بارا جاتقان ادامعا تاڭدانا قاراپ: — مۇنىڭىز نە! — دەپ داۋىستاپ جىبەردى.

— مەنىڭ ونى وتكىرلەپ وتىرۋعا مۇلدەم ۋاقىتىم جوق، ءالى 20 اعاشتى ارالاۋىم كەرەك، — دەدى وتىنشى ماڭدايىنان تەرىن ءسۇرتىپ جاتىپ.

ول اڭشىنىڭ ءسوزىن ارى قاراي قۇلاعىنا دا ىلگەن جوق. تاڭنان بەرى اينالىسىپ جاتقان جۇمىسىنا قايتا كىرىستى.

ءتۇيىن: تىنىمسىز ەڭبەك ەتۋ — ول ارينە جاقسى. ءبىراق اراسىندا، كوپ تەر توگىپ جاتساڭىز دا ەڭبەگىڭىز نە سەبەپتى ءونىمدى ەمەس ەكەندىگىنە زەر سالعانىڭىز دۇرىس بولار. ءتىپتى، بولماشى نارسەنىڭ ءوزى ءسىزدىڭ جۇمىسىڭىزدى باياۋلاتۋى مۇمكىن. سول سەبەپتى بوسقا كۇش جۇمساعانشا، كىشكەنە اقىلىڭىزدى ىسكە قوسىڭىز. سول كەزدە جۇمىسىڭىزدى تەز ءارى ساپالى ورىنداي الاسىز.

اۋلا سىپىرۋشى تۋرالى مىسال

ءبىر كىسى«Microsoft» كومپانياسىنا اۋلا سىپىرۋشى بولىپ جۇمىسقا ورنالاسۋعا كەلىپتى. كادر بولىمىندەگىلەر وعان بىرنەشە سۇراق قويىپ، تەست تاپسىرمالارىن بەرىپ:

— قۇتتىقتايمىز! ءسىز جۇمىسقا قابىلداندىڭىز. ءوزىڭىزدىڭe-mail پوشتاڭىزدى قالدىرىڭىز. ءبىز سىزگە جۇمىس كەستەسى تۋرالى حابارلاما جىبەرەمىز، — دەيدى.

— نەگىزى مەندەe-mail دى ايتپاعاندا، ءتىپتى كومپيۋتەر دە جوق، — دەپ مويىندايدى.

— وندا كەشىرىم وتىنەمىز! وندا ءبىز ءسىزدى قىزمەتكە ورنالاستىرا المايمىز. ءسىز ءۆيرتۋالدى جۇيەدە جوق ەكەنسىز. ال«Microsoft» كومپانياسىنىڭ قىزمەتكەرلەرىنە جۇمىستى ءتيىمدى ەتۋ ءۇشىنe-mail ارقىلى بايلانىسىپ وتىرامىز، — دەپ شىعارىپ سالادى.

بولعان ىسكە قايران جوق. ول كومپيۋتەر ساتىپ الۋ ءۇشىن اقشا تابۋدىڭ جولىن ويلاستىرا باستايدى. قالتاسىندا — 30$ دوللار بار. ول اقشاعا فەرمەرلەردەن 10 كيلوگرام الما ساتىپ الادى. كوشەنىڭ ادامدار ەڭ كوپ جۇرەتىن تۇسىنا كەلىپ الگى المالاردى ساتا باستايدى. بىرنەشە ساعاتتىڭ ىشىندە ونىڭ اقشاسى ەكى ەسەگە كوبەيەدى. كەيىن بىرتە-بىرتە ساۋداسى جاقسى ءجۇرىپ، تابىسىن 10 ەسەگە ۇلعايتادى. وعان: «وسىنداي قارقىنمەن جۇمىس ىستەسەم، ەشكىمگە دە جالدانباي-اق قويسام بولادى ەكەن عوي»، — دەگەن وي كەلەدى.

ارادا بىرنەشە جىلدار وتەدى، ول استىنا كولىك ساتىپ الىپ مىنەدى. سوسىن شاعىن دۇڭگىرشەك اشادى، كەيىن ونى دۇكەنگە اينالدىرادى. 5 جىلدىڭ اينالاسىندا سۋپەرماركەتتەر جەلىسىنىڭ يەسى اتانادى. كۇندەردىڭ كۇنى بيزنەسىن ساقتاندىرۋ ءۇشىن اگەنتتىككە كەلەدى. ال ساقتاندىرۋ اگەنتى ءتيىمدى ۇسىنىستار بولسا جىبەرىپ وتىرامىز دەگەن جەلەۋمەن ونىڭe-mail پوشتاسىن سۇرايدى. ال ول بولسا بۇرىنعى جاۋابىن قايتالايدى.

— مەندەe-mail پوشتاسى دا، كومپيۋتەر دە جوق!

— تاڭ قالارلىق! — دەپ ساقتاندىرۋشى باسىن شايقايدى. — سونداي ۇلكەن كاسىبىڭىز بولا تۇرا، جەكە كومپيۋتەرىڭىز جوق! ەگەر سىزدە كومپيۋتەر بولسا، قانداي نارسەلەرگە قول جەتكىزەر ەدىڭىز؟! — دەپ تاڭدانىسىن جاسىرمايدى.

سول كەزدە ول:

— وندا مەن«Microsoft» كومپانياسىنىڭ جاي عانا اۋلا سىپىرۋشىسى بولاتىن ەدىم، — دەپ جاۋاپ قايتارادى.

ءتۇيىن: ەگەر قولىڭىزدا ءبىر زات بولماسا، بالكىم ونىڭ سىزگە كەرەگى دە جوق شىعار؟

ەڭ ماڭىزدى سۇراق تۋرالى مىسال

بۇل كۇنى اقىلداسىپ العانداي بارلىعى ۇستازعا ءبىر عانا سۇراق قويىپتى: «ولگەننەن كەيىن نە بولادى؟».

ۇستاز جىلى جىميىپتى دا، ەشتەڭە دەپ جاۋاپ بەرمەستەن جۇرە بەرىپتى. سوسىن شاكىرتتەرى نە سەبەپتى ونىڭ جاۋاپ بەرۋدەن قاشىپ جۇرگەنىن سۇراپتى.

— اقىرەتتى تەك بۇل ومىردە نە ىستەۋ كەرەكتىگىن بىلمەيتىن ادامدار عانا سۇرايتىنىن بايقادىڭىزدار ما؟ ولارعا ماڭگىلىك جالعاساتىن تاعى ءبىر ءومىر كەرەك، — دەپ جاۋاپ بەرىپتى ۇستازدارى.

— سوندا دا، ولگەننەن كەيىن ءومىر بار ما؟ — دەپ ءبىر شاكىرتى سۇراۋدان جالىقپاپتى.

— ولىمگە دەيىن ءومىر بار ما؟ مىنە، ەڭ ماڭىزدى سۇراق قايدا جاتىر، — دەگەن ەكەن ۇستاز.

ءۇش دوس تۋرالى مىسال

ءبىر كۇنى ءۇش دوس بىرىگىپ، قۇرىلىستا ەڭبەك ەتىپتى. جۇمىستىڭ اۋىرلىعى سونشالىق، كۇن سايىن قاتتى شارشايتىن كورىنەدى. سوندا ءوتىپ بارا جاتقان ادامدار «نە ىستەپ جاتسىڭدار؟» دەپ سۇرايدى ەكەن.

ءۇش دوستىڭ بىرەۋى: «مەن جاي ۋاقىتىمدى وتكىزىپ ءجۇرمىن»، — دەپ تەرىن ءسۇرتىپتى. ەكىنشىسى بولسا: «ماعان اقشا تابۋ كەرەك. سول سەبەپتى ەرىنبەستەن وسى جەردە ەڭبەكتەنىپ ءجۇرمىن»، — دەپ جاۋاپ بەرىپتى. سوسىن ولار ءۇشىنشىسىنىڭ جاۋابىن بىلمەك بولىپ سۇراعاندا، ءۇشىنشى جىگىت:

— وسى جەرگە ەڭ ادەمى عيمارات سالىپ، ءىشى ادامدارعا تولىپ، ولارعا شىن مانىندە قۋانىش سيلاعانىمىزدى كورگىم كەلەدى، — دەپ الىسقا كوز تاستاپتى.

ءتۇيىن: ءبىر ىسكە ءۇش ادام، ءۇش ءتۇرلى كوزقاراسپەن قارايدى. تەك ءوزىن عانا ەمەس، وزگەلەرگە دە قۋانىش سيلاسام دەپ جۇمىس ىستەگەن ادام عانا شىنايى باقىتقا بولەنەدى.

قاينار: يىنتەرنەتتەن | رەداكتور: اراي | كورىلىم : 392 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز