جەتىستىك قۇپياسى (عيبراتتى اڭگىمە) - كەرۋەن تورابى

جەتىستىك قۇپياسى (عيبراتتى اڭگىمە)

ءبىر عۇلاما دانىشپان قارتايىپ، كارىلىك جاقىنداعاندا ءوزىنىڭ بىلگەندەرىن شاكىرتتەرىنىڭ بىرىنە ۇيرەتپەكشى بولادى. الايدا شاكىرتتەرىنىڭ اراسىنان ەڭ لايىقتىسىن قالاي تاڭدارىن بىلمەي، ۇزاق باس قاتىرادى. كەش باتىسىمەن شاكىرتتەرىنىڭ بارلىعىن ۇيىنە شاقىرتىپ الادى.

ەڭ سوڭعى شاكىرتى ۇيگە كىرگەن بويدا، دانىشپان بىلاي دەدى:

— مەنىڭ باسىما ءىس ءتۇستى. قازىر سەندەردىڭ كومەكتەرىڭە ءزارۋمىن. ماعان قول ۇشىن بەرگەندەرىڭدى قالايمىن. مەنىمەن بىرگە جۇرىڭدەر!

بارلىعى سىرتقا شىعىپ، ۇستازدارىنىڭ ارتىنان ءجۇرىپ وتىردى. بىرنەشە كوشەنى كەسىپ وتكەننەن كەيىن ءبىر ەسىكتىڭ الدىنا كەلىپ توقتادى.

— مىنا ەسىككە قاراڭدارشى. قانداي ۇلكەن، اۋىر ەكەنىن كورىپ تۇرسىڭدار… قازىر ەسىككە اسىقپاي زەر سالىپ قاراڭدار، ارالارىڭدا ەسىكتى جالعىز ءوزى اشا الاتىن ادام بولسا، ماعان ايتىڭدار، — دەيدى دانىشپان.

شاكىرتتەردىڭ بارلىعى ەسىككە مۇقيات قاراي باستايدى. بىرنەشە ۋاقىت وتكەننەن كەيىن شاكىرتتەردىڭ ءبىرازى:

— بۇل مۇمكىن ەمەس، — دەپ جاۋاپ بەرەدى.

قالعاندارى دا ۇزاق قارادى، اسىقپاي ەسىكتى ۇستاپ، تارتىپ كوردى. ءبىراق ولار دا ءبىراز ۋاقىتتان كەيىن:

— بۇل شىنىمەن دە مۇمكىن ەمەس، — دەسىپ جاتتى.

تۇتقاسىنان دا تارتىپ كوردى، ءبىراق ەشبىر ناتيجە شىقپادى. شاكىرتتەردىڭ بارلىعى بىرىنەن سوڭ ءبىرى باس شايقاپ، ەسىكتى اشۋعا تالپىنعان ويلارىنان باس تارتتى.

وسىلايشا شاكىرتتەردىڭ بارلىعى «بۇل ىسكە ءبىر ادامنىڭ شاماسى كەلمەيدى» دەگەن ويعا كەلدى. الايدا كوپ شاكىرتتىڭ بىرەۋى عانا باسقاشا ويدا بولاتىن.

وزگەلەردەن ەرەكشەلەنگەن شاكىرت ەسىكتى اسىقپاي قاراپ، قولىمەن ۇستاپ كوردى. ەسىكتى بىرنەشە جەرىنەن قاعىپ كورىپ، وي-شۇقىرىنا دەيىن اسىقپاي زەرتتەپ شىقتى. ءتىپتى ەسىكتىڭ نەدەن جاسالعانىن دا مۇدىرمەي ايتىپ بەردى.

سوسىن ول ءسال يتەرىپ كورىپ ەدى، ەسىك ەش قيىندىقسىز اشىلدى. شىندىعىندا ول جابىق ەمەس ەدى. ءسال كۇش جۇمساپ، يتەرگەننەن كەيىن بىردەن اشىلاتىنداي كۇيدە تۇرعان.

ءتۇيىن

دانىشپان ۇزاق ىزدەگەن ادامىن تاپقانىنا شىن جۇرەگىمەن قۋاندى. ول ءوزىنىڭ ساعى سۋعا كەتكەن باسقا شاكىرتتەرىنە بۇرىلىپ:

— سەندەردىڭ جەتىستىكتەرىڭ ءومىردىڭ كەيبىر جاعدايلارىنا بايلانىستى. ونى قازىر وزدەرىڭ دالەلدەپ كورسەتتىڭدەر جانە وعان كوزدەرىڭ ابدەن جەتكەن بولار.

بىرىنشىدەن، وزدەرىڭىنىڭ ىشكى تۇيسىكتەرىڭ مەن سەزىمدەرىڭە جۇگىنىڭدەر.

ەكىنشىدەن، ەشقاشان اسىعىستىق تانىتپاڭدار. ارتىنان بارماقتارىڭدى تىستەپ، وكىنىشكە ۇرىناسىڭدار.

ۇشىنشىدەن، قورقىنىشتارىڭا جەڭىس بەرمەڭدەر، سول ءۇشىن باتىل قادام جاساڭدار.

تورتىنشىدەن، شەشىم قابىلدادىڭدار ما، ودان ەشقاشان باس تارتپاڭدار. ءاردايىم ءوز مۇمكىندىكتەرىڭ مەن كۇشتەرىڭە سەنىڭدەر.

بەسىنشىدەن، ەشكىمدى تىڭداماڭدار جانە كەز كەلگەن ءىستى اياعىن دەيىن جەتكىزۋ ءۇشىن بارىنشا ەڭبەك ەتىڭدەر. جانە سوڭعى ايتارىم، قانداي دا ءبىر قاتەلىك جاساساڭدار، وكىنىشكە بوي الدىرماڭدار، — دەپ وسيەت ايتتى. مىنە، جەتىستىك قۇپياسى وسىندا جاتىر.

قاينار: يىنتەرنەتتەن | رەداكتور: سارماي | كورىلىم : 639 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز