دۇرىس دەمالۋدى ۇيرەنۋ- بويعا قۋات جيناۋدىڭ ەڭ ءتيىمدى ءتاسىلى - كەرۋەن تورابى

دۇرىس دەمالۋدى ۇيرەنۋ- بويعا قۋات جيناۋدىڭ ەڭ ءتيىمدى ءتاسىلى

كەيدە بىزگە دەمالىستان كەيىن دە دەمالىس كەرەك بوپ جاتادى. دۇيسەنبى كۇنى جۇمىسقا شىققاندا «تاعى ءبىر كۇن دەمالعانىمىزدا عوي» دەگەن تىركەستى ءجيى ەستيتىنىمىز، سونىمەن كەلىسەتىنىمىز جاسىرىن ەمەس. نەگە ولاي؟ نەنى دۇرىس ىستەمەيمىز؟ جاۋابى قيىن ەمەس، ءبىز دۇرىس دەمالۋدى بىلمەيمىز. كوپ قازاقتىڭ تويدان كەلىپ، «ۋف، شارشادىم!» دەيتىنى دە سودان. تويعا بارىپ شارشاعانىڭ، دەمەك دۇرىس دەمالماعانىڭ. ال، دۇرىس دەمالۋ شىن مانىندە سونشالىق قيىن شارۋا ەمەس. قيىن بولماعانى سەبەبىنەن دە ول «دەمالىس» دەپ اتالادى.

الدىمەن بىزگە نە كەدەرگى ەكەنىن انىقتايىق:

ۋاقىت ازدىعى

قارجى تاپشىلىعى

ۇيدە ەشنارسە ىستەمەي جاتۋدى دەمالىس ساناۋ

جاڭا دۇنيەنى ىستەپ كورۋگە ۇمتىلىستىڭ جوقتىعى

ال، ەندى بۇل ايتىلعاندار نەگە كەدەرگى سانالاتىنىن جانە ونى قالاي جەڭۋ كەرەكتىگىن ايتايىق.

ۋاقىت ازدىق. وكىنىشكە قاراي، ءبىز ۋاقىتىمىزدى دۇرىس رەتتەمەۋدىڭ كەسىرىنەن كوپ جۇمىسىمىزدى كەيىنگە شەگەرىپ، دەمالىس كۇنى سول جينالعان جۇمىستى ىستەۋمەن وتكىزەمىز. كەيىن «ءۇيدىڭ شارۋاسى بىتە مە؟» دەگەن جاتتاندى سەبەپتى جەلەۋ ەتىپ وتىرىپ، جۇمىس اپتاسىنىڭ قايتا باستالعانىن بايقاماي قالامىز. اپتا دۇرىس جوسپارلانعان جاعدايدا ەكى كۇن دەمالىستا ىستەيتىن ارتىق شارۋا بولمايدى. سول سەبەپتەن، قانداي دا ءبىر ءىستى دەمالىسقا قالدىرماي، ۋاقىتىلى جانە جۇمىس اپتاسىنىڭ ىشىندە جاساۋدى ادەتكە اينالدىرىڭىز. سول كەزدە دەمالىس كۇنىندە وزىڭىزگە كوڭىل بولەتىن ۋاقىت تابىلادى.

قارجى تاپشىلىعى. ءيا، جالاقىڭىز از بولىپ، كۇندەلىكتى ازىق-تۇلىككە اقشا جەتپەي جاتقاندا قوسىمشا شىعىن تۋرالى بىرنارسە ايتۋ قيىن. دەسە دە، تۇرمىسىڭىزداعى بارلىق شىعىندى سارالاپ كورسەڭىز سىزگە قاجەتسىز شىعىندار تابىلىپ قالۋى عاجاپ ەمەس. ەڭ باستىسى، دەمالۋ ءۇشىن كوپ اقشا قاجەت دەگەن تاپتاۋرىننان ارىلىڭىز. سەبەبى، دەمالىستىڭ قاراجات جۇمسامايتىن دا تۇرلەرى جەتكىلىكتى. مىسالى، ۇيدەن تاماق جاساپ، ارنايى ىدىسقا سالىپ، توسەنىشىڭىزدى ارقالاپ، ساياباققا بارىپ جاقسى ۋاقىت وتكىزىپ قايتۋعا بولادى.

ۇيدە ەشنارسە ىستەمەي جاتۋدى دەمالىس ساناۋ. توسەكتە اياقتى كوتەرىپ قويىپ، تەلەديدار كورۋدى دەمالعاننىڭ كوكەسى دەپ سانايتىندار جەتكىلىكتى. ءبىراق، ولار قاتتى قاتەلەسەدى. سولاردىڭ قاتارىنان بولساڭىز، ويىڭىزدى وزگەرتىڭىز. دەمالىستى سىرتقا شىعىپ، تابيعات اياسىندا، ساياباقتا سەرۋەندەپ وتكىزۋدى ادەتكە اينالدىرىڭىز. جوعارىدا كەلتىرىلگەن مىسال دا وسى جەردە ورىندى.

جاڭا دۇنيەنى ىستەپ كورۋگە ۇمتىلىستىڭ جوقتىعى. ءبىز ەرتە قارتايامىز. سەبەبى، وقۋ بىتىرە سالىپ جاڭا نارسە ۇيرەنۋدى دوعارامىز، ءوزىمىزدىڭ باسقا ءبىر قىرىمىزدى اشىپ كورۋدى ويلامايمىز. ءسويتىپ، تۇلعا رەتىندە ءوسۋدى توقتاتامىز. ءبىر دەمالىسىڭىزدى جاڭا دۇنيەنى ىستەپ كورۋگە ارناساڭىز، ءومىرىڭىزدىڭ قالاي وزگەرگەنىن بايقايسىز. مىسالى، ۆەلوسيپەد تەبە الماساڭىز، الداعى دەمالىستى سونى ۇيرەنۋگە ارناڭىز. قىزىق بولارى جانە راحاتتانىپ قالاتىنىڭىز ءسوزسىز.

قاينار: قازاقىستان تورابى | رەداكتور: سارماي | كورىلىم : 470 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز